احذر ثم احذر من وظائف الفوركس فى مصر

[شريف خورشيد]

الفوركس , احذر , وظائف

احذر ثم احذر من وظائف الفوركس فى مصر

بسم الله الرحمن الرحيم

تحية طيبة وبعد

فى حقيقة الامر ترددت كثيرالكتابة هذاالموضوع
لعدة اسباب منها اننى اقوم بتقديم الدورات التدريبية
و هنا من سوف يعتقد اننى اكتب هذا
الموضوع للدفاع عن مصالحى الشخصية
ولكن قررت كتابة الموضوع بسلامة
نية وبدون اى مصالح

********

اسباب كتابة الموضوع
اننى سمعت قصة مكررة كثيرا من بعض الاخوان
سواء عن طريق التليفون او البريد الالكترونى
وبنفس الاسلوب ونفس النهج
وهى سرقة الناس تحت مسمى الفوركس
وبما ان هذا المجال للاسف الشديد
ما زال جديد فى عالمنا العربى
سوف نجد كل يوم من يحاول ان يقوم
باستغلال الناس تحت مسمى الفوركس
لذلك ان من واجبى ومن واجب اى شخص
نظيف ويتقى الله ان يقوم بمحاربة هؤلاء الاشخاص
لانهم بالفعل يرتكبوا حماقات بسبب
طمعهم او بسبب استغلال الناس
ويشوهون سمعة هذا المجال

****
اليك القصة كما تروى ومن اشخاص مختلفين



اعلان على صفحات الانترنت او اى جريدة مثل الوسيط




مطلوب موظفين

المسمى الموظيفى
( مراقب شاشات - محلل فنى -................ الى اخره )

ونفسى اعرف الحقيقة ياعنى ايه كلمة مراقب شاشات !!!
ما علينا

براتب يبدا من 2000 جنيه الى 3000 جنيه


طبعا شبابنا غلبان وقرفان وطالع عينه فى وظيفة تكون محترمة وياكل منها عيش

صاحبنا الشاب يبدا فى تحضير نفسه
وتجهيز نفسه ويبدا بالاتصال مع
البيانات فى الاعلان المنشور

ويتم تحديد الموعد


يذهب صاحبنا للموعد يجد
مكان شيك ومجهز وعلى احدث ما يكون
وطاقم من السكرتارية محترم
( متقولش داخل السفارة الامريكية )

طبعا تاتى السكرتارية
وتطلب منه ملئ استمارة وبعض الاسئلة
( صاحبنا عينه زايغة شوية يقول لنفسه
انا مستعد اشتغل من غير مرتب بس اشتغل هنا)

ومن ثم تتدخل هذه الورقة
للنصاب الكبير
وغالبا بيقولوه الدكتور فلان
(فى حين هو اساسا لا يملك الثانوية العامة )

طبعا سعتك تتدخل تلاقى الدكتور فلان على مكتبه
ومشغل شاشة قدامه ومخليك عايش فى المود
لدرجة انك تحس انك قاعد مع اوباما نفسه

يبدا بقى الحوار معاه
طبعا الابلكشن الا حضرتك مليته واضح فيه انك
مثلا لا تعلم شئ عن الفوركس او حتى تعلم

يبدا الدكتور فلان ( النصاب )
يستعرض بقى احنا شركة اجنبية ومجموعة مستثمرين
والفيلم الهندى الهابط الا بنسمعه كتير من الشركات اياها
وبعد الاطلاع على الابلكشن
يقولك احنا وافقنا عليك ولكن مطلوب منك تاخد كورس
عشان تقدر تتحمل المسؤلية
وهنا مربط الفرس


طبعا حضرتك بتفكر فى الوظيفة
وعينك على المرتب

الدكتور فلان بيقولك انتا ممكن تاخد الكورس برة او عندنا
( قال ياعنى الرجل ديمقراطى )


حضرتك تقوله خلاص اخد الكورس معاكوا

سعتك تسال ثمن الكورس كام
يقولك 4000 جنيه


طبعا حضرتك بردوا عينك على الوظيفة
وبتقول لنفسك مش مهم انا شهرين واجيب تمن الكورس

حضرتك بدل ما تاخد فلوس دفعت فلوس !!

لكن انتظر الفيلم فى بدايته لسه مخلصش
بعد انتهاء الكورس سعتك فرحان ومبسوط

هيقولك الاتى

فى امتحان نهائى وهو
دة الا هيحدد انك هتكون معانا ولا لاء ؟؟؟

طبعا حضرتك استغربت
لا متستغربش


هيقولك دة حساب ديمو ب 1000 دولار

المطلوب منك الحساب دة فى خلال اسبوع 10000 الاف دولار
لو دة اتحقق يبقى انتا كدة فى الوظيفة ومعنا


طيب لو محققتش دة

يبقى اسفين انتا مش معنا وانتا مش قد المسؤلية


طبعا مش لوحدك الا وقعت فى الفخ فى غيرك كانوا مقدمين
ما يقرب 20 واحد فى يومك

والحسابة بتحسب


وبكدة انتها فيلم
( انا عاوز اشتغل محلل فنى )

المنتج
شركة فوركس بخ بجزر مورشيوس

بطولة
النصاب الكبير الدكتور فوركساوى


اخراج
ابن عم الدكتور فوركساوى


بكرر وبحذر تانى الا اتعرض للناس دة

ياريت يبعتلى اميل
يقولى اسم الشركة دة ايه ومقرها فين وقابل مين بالاسم
عشان يتم فضحهم رسمى
وبكرر وبقول تانى انا شخصيا مش هسمح
ان سمعة المجال دة تتلوث اكترمن كدة وخصوصا فى مصر
والشركات الا تحت بير السلم
حان الوقت لفضحهم لان هما دول الاشوهوا مجال الفوركس
الثورة فى مصر قامت عشان تنضف وبعون الله هنضف
البلد من الاشكال دة

الله بلغت اللهم فاشهد

الموضوع الأصلي: احذر ثم احذر من وظائف الفوركس فى مصر || الكاتب: شريف خورشيد || المصدر: منتديات اف اكس حـــورس - بورصة العملات والاسهم

www.fxhorus.com

المصدر: منتديات اف اكس حورس

[احمد صقر]

الله عليك ياجنرال

وربنا يستر على الشباب الغلبانه اللى بتصدق تلاقى اى حاجه

وانا معاك فى الحرب

[محارب الفوركس]

احب اهنيك يا جنرال على الموضوع دا

وفعلا انتشرت مثل هذه الشركات للاسف فى مصر


وفعلا يقع فى هذا الخطا شباب كثير من شباب مصر الغالين


مره تانيه الف الف شكر يا استاذ شريف على التحذير

[شريف خورشيد]

المشاركة الأصلية كتبت بواسطة احمد صقر

الله عليك ياجنرال

وربنا يستر على الشباب الغلبانه اللى بتصدق تلاقى اى حاجه

وانا معاك فى الحرب

هى حرب فعلا يا صقر
والموضوع زاد عن حده
ولازم يتم فضحهم وبالاسماء والعناوين كمان
عشان الكل يبقى عارف ان العالم دة بلاك ليست
وملهومش علاقة لا بالفوركس ولا غيره
دول شوية افاقين ونصابين

[يحيى شرف]

فعلا يا جنرال والله الموضوع بقى مقلق جدا جدا

والله يستر على شباب مصر من الشركات النصابه دي


يعنى انا لو هعرف احول من 1000 ل 10000 فى اسبوعين

هروح اشتغل معاهم سبحان الله

[magic__man]

انشاء الله يا جنرال كلنا مع بعض يد واحده وهنضف المجال من النصابين واللصوص

[ياسر محمد]

بقينا تايهين والله بين النصاب وابن الحلال
شكرا يا جيرنال علي التحذير

[ahmed.fx]

فعلا كثرت الاعلانات عن هذه الاعمال فى المجلات الصغيره و الجرايد الاعلانيه

ربنا يستر على المجال ده و شكرا يا جنرال على التنبيه

[mnour66]

ا.شريف

لو عايز فعلاً تحاربهم او تعرف اماكنهم ببساطة جريدة الوسيط فى قسم وظائف تجد سيادتك اسبوعياً تقريباً يوجد اعلان مرة التليفون فى الزيتون ومرة مدينة نصر ومرة الهرم سهلة جداً الاتصال بالرقم ثم الاستفسار بسلامة نية ومعرفة المكان وخلاص
ربنا يوفقك للخير

[essam sheboo]

فى شركة اسمها تريد فور ايجيبت صاحبها اسمة احمد ابو الدهب دا نصاب عالمى فى الفوريكس بيلعب بالشباب الله ينتقم منة الشركة كان اسمها trade4 egypteوكانت فى عباس العقاد ودلوقتى سماها المجموعة العربية العالمية دا بيوهم الشباب بمرتب 2000 ودلوقتى خلاه 1500 مقابل 40 عقد ستاندرد يعنى تعمل 40 تريدة كل تريدة ب20 بيب علشان تاخد المرتب ولو عملت 39 تريدة صح والاخيرة غلط ملكش مرتب وتنطرد طب بالله عليكم مين يدوب لسة واخد كورس فى الفوركس مش هيغلط اذاكان هو نفسة اللى بقالة 10 سنين فى الفوريكس بيغلط وهو دايما بيغير مقر شركتة من حلمية الزيتون لصلاح سالم لعباس العقاد ودلوقتى فى المظلات فى ابراج اغاخان برج رقم 11 الدور العاشر تحت اسم المجموعة العربية العالمية قال عالمية قال حسبنا الله ونعم الوكيل فيك يا احمد يا ابوالدهب اخر نصباية له انة بيعمل جمعية اسمها المليون شاب هياخد من كل شاب تقريبا 60 جنية ياريت الشباب تبعد عن الحرامى دا